ᓱᒐᔭᖅᑲ ᑐᓂᓯᓐᓂᕈᒪ ᐸᐃᑉᐹᓂ ᖃᐅᔨᒃᑲᐃᔾᔪᑎᒥᑦ?
ᐃᑲᔪᖅᑏᑦ ᐃᖅᑲᓇᐃᔭᖅᑏᑦ ᕿᒥᕐᕈᒐᔭᖅᑐᑦ ᖃᐅᔨᒃᑲᐃᔾᔪᑎᓐᓂ ᑐᑭᓯᒋᐊᕈᑎᓕᒫᓂᑦ ᓈᒪᒐᓗᐊᕐᒪᖔᑕ ᓲᕐᓗ ᒪᑯᐊ:
- ᖃᐅᔨᒋᐊᕐᕖᑦ ᑐᔅᓯᕋᖅᑑᑉ ᐊᒻᒪᓗ ᑭᐅᔫᑉ;
- ᑎᑎᖅᑲᐃᑦ ᐊᑎᓕᐅᖅᓯᒪᔪᑦ;
- ᓇᓗᓇᐃᔭᖅᓯᒪᔪᑦ ᖃᓄᐃᑦᑐᒥᓂᐅᓂᕐᓂᑦ, ᖃᓄᕐᓗ ᐊᑕᐅᓯᕐᒧᑦ ᐅᖓᑖᓄᓪᓘᓐᓃᑦ ᓯᖁᒥᑦᑎᓂᕐᒪᖔᑕ ᒪᓕᒋᐊᓕᓐᓂᑦ;
- ᐃᑲᔪᖅᑐᐃᔾᔪᑏᑦ ᐸᐃᑉᐹᑦ; ᐊᒻᒪᓗ
- ᐊᔪᓐᓇᓐᖏᒐᐃᒻᒪᑦ ᐅᕝᕙᓘᓐᓃᑦ ᑐᔅᓯᕋᖅᑐᖃᕐᓂᖅᑲᑦ, ᑎᑎᕋᖅᓯᒪᔪᑦ ᐃᓄᑦᑎᑑᓕᖅᓯᒪᓗᒋᑦ;
ᑐᔅᓯᕌᖑᑉᐸᑕ, ᑲᑎᒪᔩᑦ ᐃᓄᑦᑎᑑᓕᕆᔪᓐᓇᖅᑐᒥ ᑎᓕᓯᒍᓐᓇᖅᑐᑦ ᐃᓕᓴᕆᔭᐅᓯᒪᔪᒥᑦ ᐅᖃᐅᓯᕐᒥᑦ.
ᐊᔾᔨᖓᓐᓂ ᖃᐅᔨᒃᑲᐃᔾᒧᑎᒥᑦ ᑐᔫᕕᐅᒐᔭᖅᑐᖅ ᐃᓄᒃ ᑎᒥᐅᔪᕐᓘᓐᓂᑦ ᑎᑎᕋᖅᓯᒪᔪᑦ ᒪᓕᓪᓗᒋᑦ ᑭᐅᓯᒪᔪᒧᑦ ᖃᐃᔨᒃᑲᐃᔾᔪᑎᒧᑦ. ᑭᐅᓯᒪᔪᖅ ᐱᔪᓐᓇᐅᑎᖃᕐᒥᔪᖅ ᑭᐅᔭᕆᐊᖃᖅᑐᓂ ᖃᐅᔨᒃᑲᐃᔾᔪᑎᒥᑦ.
ᑭᐅᔪᖅ ᑭᔾᔪᓯᖏᓐᓂ ᖃᐅᔨᒃᑲᐃᔾᔪᑎᒧᑦ ᐅᑎᖅᑎᑦᑎᒋᐊᓕᒃ ᐊᓪᓚᕕᖓᓐᓄᑦ ᑲᑎᒪᔩᑦ. ᑭᐅᔪᖅ ᐅᓪᓗᓄᑦ 60−ᓄᑦ ᑭᓇᓱᒍᓐᓇᖅᑐᖅ.
ᑭᐅᔫᑉ ᑭᔾᔪᓯᖏᓐᓂ ᐱᑉᐸᑦ ᖃᐅᔨᒃᑲᐃᔾᔪᒻᒧᑦ ᑲᑎᒪᔨᓄᑦ ᑐᓂᓯᒐᔭᖅᑐᑦ ᐊᔾᔨᖓᓐᓂ ᐃᓕᓐᓄᑦ.
ᖃᐅᔨᒃᑲᐃᔾᔪᑎᓂᑦ ᐊᒻᒪᓗ ᑭᔾᔪᓯᕐᓂᑦ ᕿᒥᕐᕈᔭᐅᓲᑦ ᑲᑎᒪᔨᓄᑦ (ᑕᑯᓗᒍ ᐃᓚᖓ 4 ᕿᒥᕐᕈᔭᐅᕙᑦᑐᑦ). ᑖᒃᑯᐊ ᕿᒥᕐᕈᔭᐅᕙᑦᑐᑦ ᐃᓱᒪᓕᐅᑦᑕᓕᖅᑐᑦ ᑲᔪᓯᓂᐊᕐᒪᖔᑕ ᖁᔭᓈᖅᓯᓂᐊᕐᒪᖔᑕᓘᓐᓃᑦ ᖃᐅᔨᒃᑲᐃᔾᔪᑎᒥᑦ ᐊᑐᕐᓗᑎᑦ ᒪᓕᕐᓂᑦ ᓇᓗᓇᐃᔭᖅᓯᒪᔪᓂᑦ 23−ᒥ ᐊᒻᒪᓗ 24−ᒥ ᐱᖁᔭᕐᓂᑦ. ᑲᑎᒪᔩᑦ ᐃᒪᐃᑦᑐᓂᑦ ᕿᒥᕐᕈᓲᑦ
- ᖃᓄᐃᓚᐅᖅᓯᒪᓂᖏᓐᓂ ᐊᕐᕌᒎᓐᓂᒃ ᒪᕐᕉᓕᖅᑑᓐᓂᒃ;
- ᑕᒪᓐᓇ ᐊᓯᐊᒍᑦ ᒪᓕᒐᖅᑎᒍᑦ ᑲᒪᒋᔭᐅᓯᒪᒻᒪᖓᖅ;
- ᐅᓐᓂᕐᓘᑎ ᒥᑭᓗᐊᓘᕙ, ᑐᑭᓯᔭᔅᓴᐅᓐᖏᓚᕐᓘᓐᓃᑦ ᐅᕝᕙᓘᓐᓃᑦ ᓈᒻᒪᖏᑦᑐᖅ ᐱᔾᔪᑎᓪᓗᐊᖑᓐᖏᑦᑐᖅ;
- ᐱᒋᐊᕈᑕᐅᓯᒪᕙᑦ ᐅᓐᓂᕐᓘᑕᐅᓯᒪᔪᑦ ᒪᓕᑦᑐᒋᑦ ᐊᑕᐅᓯᕐᒧᑦ ᒪᓕᒋᐊᓕᓐᓂ ᑐᓐᖓᕕᐅᔪᓂᑦ;
- ᐃᓚᖏᓐᓂ ᐱᑕᖃᖅᑲ ᑕᐃᒪᐃᓪᓗᐊᖅᑎᑕᐅᓐᖏᓐᓂᖏᓐᓂ ᐅᕝᕙᓘᓐᓃᑦ ᐋᖅᑭᒍᓐᓇᖏᑦᑐᓂᓪᓘᓐᓃᑦ ᐱᑕᖃᖅᑲᑦ ᑕᐃᒪᐃᓪᓗᐊᑎᑦᑎᓐᖏᓐᓂᑯᒧᑦ; ᐊᒻᒪᓗ
- ᑐᔅᓯᕋᐅᑎ ᐋᖅᑭᑦᑕᐅᓇᓱᓐᓂᖅᑳ ᓈᒻᒪᑦᑐᒥᑦ.
ᑲᑎᒪᔩᑦ ᑎᑎᖅᑲᑎᒍᑦ ᐃᓱᒪᓕᐊᒥᓂᕐᒥᓂᑦ ᑐᓂᓯᒐᔭᖅᑐᖅ ᑎᓴᒪᖓᓐᓂ ᕿᒥᕐᕈᔭᐅᒋᐊᓕᓐᓂ ᑭᐅᔪᓄᑦ ᐊᒻᒪᓗ ᑐᔅᓯᕋᖅᑐᒧᑦ. ᐃᓱᒪᓕᐅᕋᔭᖅᑐᑦ ᑲᔪᓯᑐᐃᓐᓇᕐᓗᑎᓪᓗᓐᓃᑦ ᐅᕝᕙᓘᓐᓃᑦ ᖁᔭᓈᖅᑕᐅᓗᓂ ᖃᐅᔨᒃᑲᐃᔾᔪᑎ.
ᖃᐃᔨᒃᑲᐃᔾᔪᑎᒥᑦ ᑲᔪᓯᓐᓂᐊᖅᑲᑦ ᑲᑎᒪᔨᖏᑦ ᑕᒪᓐᓇ ᐋᖅᑭᑦᑕᐅᓇᓱᒃᑲᔭᖅᑐᖅ ᐊᑐᕐᓗᑎᑦ ᑲᑎᒪᔨᓂᑦ, ᐃᒻᒥᒃᑰᖅᑐᓂᑦ ᐋᖅᑭᔅᓱᐃᔨᓂᑦ, ᓄᓇᓕᓐᓂ ᐃᓐᓇᕐᓂᑦ ᐊᒻᒪᓗ ᐊᓯᖏᓐᓂ ᑲᑐᔾᔨᖃᑎᒌᓐᓂᑦ.
ᓈᒻᒪᒐᐃᒻᒪᑦ ᑲᑎᒪᔩᑦ ᐃᔭᐅᖅᑐᐃᒐᔭᖅᑐᑦ ᐃᓕᓐᓂᑦ ᐊᒻᒪᓗ ᑐᔅᓯᕋᖅᑐᒥᑦ ᐋᖅᑮᓇᓱᐊᖃᑎᖃᓗᓯ ᐃᑲᔪᕈᓐᓇᖅᑐᒥᑦ ᐊᑐᐃᓐᓇᐅᑎᑕᐅᒐᔭᖅᑐᖅ ᑲᑎᒪᔨᓄᑦ ᐋᖅᑮᓇᓱᐊᖅᑎᓪᓗᓯ.
ᐋᖅᑮᖃᑎᒌᒃᑯᔅᓯ ᐊᒻᒪᓗ ᐊᖏᖃᑎᒌᔅᓯᒪᓕᕐᓗᓯ, ᐃᕝᕕᑦ ᑭᐅᔪᕐᓗ ᐋᖅᑮᓂᑦᑎᓐᓄᑦ ᐊᖏᕈᑎᒥᑦ ᑎᑎᕋᕆᐊᖃᖅᑐᓯ ᐊᒻᒪᓗ ᖃᐅᔨᒃᑲᐃᔾᔪᑎᓯ ᐱᔭᕇᕋᔭᖅᑐᖅ.
ᐋᖅᑭᒍᓐᓇᓂᓐᖏᑉᐸᑦ, ᑲᑎᒪᔩᑦ ᓈᓚᑦᑎᑦᑎᒐᔭᖅᑐᑦ, ᑭᒃᑯᓕᒫᖅᑎᑦᑎᓗᑎᑦ ᖃᐅᔨᒃᑲᐃᔾᔪᑎᒥᑦ. ᑲᑎᒪᔩᑦ ᐃᓕᓐᓂᑦ ᑲᒪᓚᐅᓐᖏᑦᑐᑦ ᐅᕝᕙᓘᓐᓃᑦ ᑐᔅᓯᕋᖅᓯᒪᔪᒥᑦ ᑎᓕᔭᐅᒐᔭᖅᑐᑦ ᓈᓚᑦᑎᑦᑎᓗᑎᑦ. ᓈᓚᑦᑎᑦᑎᓕᕈᑎᑦ, ᐃᕝᕕᑦ ᑐᔅᓯᕋᖅᑐᓪᓗ ᐅᓂᒃᑳᕋᔭᖅᑐᓯ ᓱᓕᓂᕋᖅᓯᒪᓗᓯ ᐊᒻᒪᓗ ᐊᐱᖅᓱᕆᐊᓕᓐᓂ ᖃᐃᖁᔨᓯᒪᓗᓯ ᐊᖏᖅᓯᒪᒻᒥᓗᑎᓪᓗ, ᑕᐃᒫᔅᓴᐃᓐᓇᐸᓗᒃ ᐃᓕᖅᑯᓯᖃᓲᖑᒻᒪᑕ ᐃᖅᑲᖅᑐᐃᕕᒻᒥ. ᑎᑎᕋᖅᓯᒪᔪᑦ ᓴᖅᑭᖅᑕᒍᓐᓇᖅᑐᑦ ᓈᓚᑦᑎᑦᑎᓪᓗᒋᑦ. ᐃᕝᕕᑦ ᐊᒻᒪᓘᓐᓃᑦ ᑐᔅᓯᕋᖅᓯᒪᔪᖅ ᒪᓕᒐᓕᕆᔨᖃᕈᓐᓇᖅᑐᓯ ᓈᓚᑦᑎᑦᑎᓪᓗᒋᑦ.
ᑐᓵᓚᐅᖅᑎᓪᓗᒋᑦ ᐅᓂᒃᑳᕐᓂᑦ ᐊᐃᕙᔾᔪᑎᖏᓐᓂᓪᓗ ᐃᓕᔅᓯ ᐊᒻᒪᓗ ᑐᔅᓯᕋᖅᑑᑉ, ᑲᑎᒪᔩᑦ ᐃᓱᒪᓕᐅᕋᔭᖅᑐᖅ ᑕᐃᒪᐃᓪᓗᐊᑎᑦᑎᖏᑦᑐᖃᕐᓂᕐᒪᖔᖅ ᐸᕝᕕᓴᑦᑐᖃᕐᓂᕐᒪᖔᓪᓘᓐᓃᑦ ᐊᒻᒪᓗ ᖃᓄᐃᓘᕐᓂᐊᕐᒪᖔᑕ ᐋᖅᑭᒐᓱᐊᕐᓗᒍ.
ᑎᑎᕋᖅᓯᒪᔪᓂᑦ ᐃᓱᒪᓕᐊᒥᓂᕐᓂᑦ ᑎᑎᕋᖅᑕᐅᒐᔭᖅᑐᑦ ᑐᓴᖅᑕᒥᓃᑦ ᐊᒻᒪᓗ ᖃᓄᖅ ᒪᓕᒐᖅ ᐊᑐᕋᔭᕐᒪᖔᖅ. ᐃᓱᒪᓕᐊᒥᓂᕐᒥᑦ ᖃᐅᔨᑉᐸᑕ ᑕᐃᒪᐃᓪᓗᐊᑎᑦᑎᖏᑦᑐᒥᓂᕐᒥᑦ ᐅᕝᕙᓘᓐᓃᑦ ᐸᕝᕕᓴᑦᑐᒥᓂᕐᒥᑦ, ᑲᑎᒪᔨᑦ ᐃᒪᐃᑦᑐᓂᑦ ᑎᓕᓯᒍᓐᓇᕋᔭᖅᑐᑦ:
- ᐊᑭᓖᑎᑕᐅᓗᓂ ᑕᐃᒪᐃᓪᓗᐊᑎᑦᑎᖏᑦᑐᒥᓂᐅᓂᖓᓐᓄᑦ ᐸᕝᕕᓴᑦᑐᒥᓂᐅᓂᖓᓐᓄᓪᓘᓐᓃᑦ
- ᑕᐃᒪᐃᖁᔭᐅᒍᓐᓃᕐᓗᓂ ᐅᕝᕙᓘᓐᓃᑦ ᑕᐃᒪᐃᑦᑕᐃᓕᒪᑎᑦᑎᖃᑦᑕᕐᓗᓂ ᓯᕗᓂᑦᑎᓐᓂ,
- ᑲᒪᓗᓂ ᐃᓕᓐᓂᐊᖅᑎᑕᐅᓗᓂ ᑕᐃᒪᐃᓪᓗᐊᑎᑦᑎᑦᑕᐃᓕᒪᑎᑦᑎᒐᓱᐊᕐᓂᕐᒧᑦ,
- ᒪᒥᐊᓪᓗᓂ, ᐅᕝᕙᓘᓐᓃᑦ
- ᐊᓯᖏᓐᓂ ᐋᖅᑭᒋᐊᑎᑦᑎᓇᓱᐊᕐᓗᓂ ᑲᑎᒪᔨᓄᑦ ᓈᒻᒪᒋᔭᐅᑉᐸᑦ.
ᑎᓕᓯᔾᔪᑏᑦ ᑲᑎᒪᔨᓐᓃᓐᖔᖅᑐᑦ ᐊᔭᐅᖅᑐᖅᑕᐅᔪᓐᓇᖅᑐᑦ ᓄᓇᕗᒻᒥ ᐃᖅᑲᖅᑐᐃᕕᓕᕆᔨᒃᑯᓐᓂ.
ᖃᐃᔨᒃᑲᐃᒋᐊᖃᕐᓂᕐᒧᑦ ᐃᓕᖅᑯᓯᐅᔪᑦ ᑕᕝᕙᓂᑦᑐᑎᑦ ᐸᐃᑉᐹᖅᐸᔮᕐᓂᑦ ᑎᑎᕋᖅᓯᒪᔪᓂᑦ.