ᑭᒡᓕᓯᓂᐊᖅᑏᑦ
ᐃᐅᕈᓪ ᕙᓚᑦᓱ |
ᐃᐅᕈᓪ ᕙᓚᑦᓱ ᓄᓇᕗᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᖓᓂ ᐃᓕᓴᐃᔨᐅᓕᖅᑐᖅ ᐊᕐᕋᒍᑦ 20 ᐅᖓᑖᓄᑦ. ᐱᔭᕆᕈᓯᖅᑕᐅᓯᒪᔪᖅ ᐃᓅᖃᑎᒋᒃᑐᓕᕆᓂᕐᒥᒃ ᐊᒻᒪᓗ ᐃᓐᓇᐃᑦ ᐃᓕᓐᓂᐊᖅᑎᑕᐅᓂᖏᓐᓂᒃ. ᓄᓇᓕᖕᒥᐅᓂᒃ ᐃᓚᐅᖃᑕᐅᔪᒻᒪᕆᒃ ᓇᓂᓯᖃᑕᐅᓂᕐᒧᓪᓗ ᐃᓚᒋᔭᐅᓪᓗᓂ ᐊᒻᒪᓗ ᐊᑭᓕᖅᓱᖅᑕᐅᓇᓂ ᐱᓕᕆᖃᑕᐅᓱᖑᓪᓗᓂ ᕿᕿᖅᑕᓗᖕᒥᑦ ᐃᑲᔪᖅᑕᐅᔪᒪᓂᕐᒧᑦ ᓯᕙᓂᖅᑕᐅᕕᖕᒥᒃ, ᐃᓚᐅᖃᑕᐅᖏᓐᓇᓱᖑᓪᓗᓂᓗ ᑲᑎᒪᔨᐅᕕᖕᓄᑦ, ᐃᖃᖅᑐᐃᔨᕋᓚᖑᖃᑕᐅᔪᖅ ᓄᓇᕗᒻᒥ, ᑲᑎᒪᔨᕋᓛᖑᖃᑕᐅᓪᓗᓂᓗ ᐊᓄᓪᓚᒃᓯᕕᓕᕆᔨᒃᑯᓐᓄᑦ ᑲᓇᑕᒥ ᐊᒻᒪᓗ ᓂᔾᔭᐅᓯᔭᖅᑎᐅᒋᓪᓗᓂ. |
ᐹᓂ ᐊᓪᒪᓐ |
ᐱᖓᓲᔪᓂ ᐊᕐᕌᒍᓕᓵᕐᓂ ᒥᔅ ᐊᓪᒪᓐ ᐃᖅᑲᓇᐃᔭᓕᖅᑐᖅ ᖁᕐᓗᖅᑑᑉ ᕼᐋᒪᓚᖓᑕ ᑐᑭᒧᐊᒃᑎᑦᑎᔨᒋᔭᐅᓪᓗᓂ ᓄᓇᓕᖕᒥ ᖃᓄᐃᙱᓐᓂᕐᒧᑦ. ᐃᖅᑲᖅᑐᐃᔨᕋᓛᖑᑕᐅᖕᒥᔪᖅ ᐊᒻᒪ ᑐᖁᖓᔪᓕᕆᔨᐅᒋᓪᓗᓂ ᓄᓇᕗᒻᒧᑦ. ᒥᔅ ᐊᓪᒪᓐ ᓄᓇᓕᖕᒧᑦ ᑎᒥᐅᔪᓂ ᖃᓄᐃᓕᐅᖃᑕᐅᖃᑦᑕᕐᒥᔪᖅ ᐃᓚᒋᔭᐅᓪᓗᓂ ᓄᓇᓕᖕᓂ ᐃᖅᑲᖅᑕᑐᐃᕕᓕᕆᔨᒃᑯᓐᓄᑦ ᑲᑎᒪᔨᐅᖃᑕᐅᓪᓗᓂᓗ ᖁᕐᓗᖅᑐᕐᒥ ᐃᒡᓗᓕᕆᔨᒃᑯᓐᓄᑦ. ᐹᓂ ᓯᓚᑦᑐᖅᓴᕐᕕᒡᔪᐊᕐᒥᑦ ᐃᓕᓐᓂᐊᕌᓂᒃᓯᒪᓂᑰᔪᖅ ᐃᓄᓕᕆᔨᐅᓂᕐᒥᒃ. ᐊᒥᓱᓂᒃ ᖃᓄᐃᓕᐅᕈᓘᔭᖃᑦᑕᕐᓂᑰᕗᖅ ᐃᓅᖃᑎᒌᓄᑦ ᐃᖅᑲᖅᑐᐃᔨᓕᕆᓂᕐᒥ ᑭᒃᑯᑐᐃᓐᓇᕐᓗ ᐱᔪᓐᓇᐅᑎᖏᓐᓄᑦ.
|
ᓗᐃᔅ ᕼᐊᐅᓕ |
ᓗᐃᔅ ᕼᐊᐅᓕ ᐃᒡᓗᓕᖕᒥᐅᑕᐅᔪᖅ, ᓄᓇᓕᖕᒥᑦ ᖃᓄᐃᖏᑦᑎᐊᕐᓂᕐᒧᑦ ᐊᑕᐅᑦᓯᑯᖅᑎᓯᔨᒋᔭᐅᔪᖅ ᐃᒡᓗᓕᖕᒥᑦ ᕼᒻᓚᑦᖓᓐᓄᑦ. ᐃᑲᔪᖃᑕᐅᓯᒪᔪᖅ ᐸᕐᓇᐃᓂᕐᒥᒃ ᐃᓕᓐᓂᐊᕈᑎᒃᓴᓂᒃ ᓄᓇᓕᖕᒥᑦ ᖃᓄᐃᖏᑦᑎᐊᕐᓂᕐᒧᑦ ᐃᓕᓴᖅᑕᐅᔪᒃᓴᓂᒃ ᒪᓕᒃᖢᓂ ᐃᓄᐃᑦ ᐃᓕᖁᓯᑐᖃᖏᓐᓂᒃ ᐃᓄᑐᖃᕐᓄᑦ ᖃᐅᔨᒪᔭᐅᔪᓂᒃ ᒪᑯᓂᖓᓗᐊᖑᐊᖅ ᐊᑖᑕᐅᓂᕐᒧᑦ ᐊᓈᓇᐅᓂᕐᒧᑦ ᐊᖓᔪᖄᖑᓂᕐᒧᑦ ᐊᒻᒪᓗ ᐃᓚᒋᒃᑐᐃᑦ ᑐᓴᐅᒪᖃᑎᒌᒃᐸᓪᓕᕐᓂᕐᒧᑦ ᐊᔪᕈᓐᓂᖅᓴᐃᓂᕐᒥᒃ ᐊᒻᒪᓗ ᑕᑯᔪᒪᔪᖅ ᐃᓄᒻᒪᕆᖕᓂᒃ ᓴᓐᖏᓕᖅᐸᓪᓕᖁᔨᓪᓗᓂ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᓗᐃᔅ ᐊᑭᓕᖅᓱᖅᑕᐅᖏᓪᖢᓂ ᐃᑲᔪᓱᖑᖕᒥᔪᖅ ᐃᓄᑐᖃᕐᓂᒃ ᐳᓛᖃᑦᑕᖅᖢᓂ ᐊᖏᕐᕋᖏᓐᓂᒡᓗ ᑲᒪᖃᑦᑕᖅᖢᓂ. |
ᒪᕐᑎᓐ ᕿᓚᒃ |
ᒥᔅᑕ ᕿᓚᒃ ᐃᓅᓚᐅᖅᓯᒪᔪᖅ ᐃᒡᓗᕕᒐᕐᒥ ᐅᑯᓯᐊᓗᖕᒥ, ᐅᖓᓯᖕᓂᖃᐸᓗᒃᖢᓂ 90 ᒪᐃᔪᓪᓂ ᐃᒡᓗᓕᒑᕐᔫᑉ ᑲᓇᖕᓇᖓᓂᑦ. ᐃᓚᖏᑦ ᓅᓕᓚᐅᖅᓯᒪᔪᑦ ᐃᒡᓗᓕᒑᕐᔪᖕᒧᑦ. ᔫᓴᕝ ᐳᕐᓂᐅᑉ ᒐᕙᒪᑐᖃᒃᑯᑦ ᐃᓕᓐᓂᐊᕐᕕᖓᓄᙵᐅᕙᓚᐅᖅᑐᖅ ᐊᒻᒪ ᑰᒡᔪᐊᕌᓘᑉ ᐃᓕᓐᓂᐊᕐᕕᖓᓄᑦ, ᑰᒡᔪᐊᕌᓗᖕᒥ, ᒫᓂᑑᐸᒥ. ᐃᒡᓗᓕᒑᕐᔪᖕᒧᑦ ᐅᑎᓕᓚᐅᖅᐳᖅ ᐊᖑᓇᓱᐃᓐᓇᕈᓐᓇᕐᓂᐊᕋᒥ ᐃᓚᒥᓄᑦ. 1982-ᒥ ᑲᑎᑎᑕᐅᓚᐅᖅᑐᖅ ᓅᖦᖢᓂᓗ ᖃᒪᓂᑦᑐᐊᕐᒧᑦ. ᒪᕐᑎᓐ ᐃᖅᑲᓇᐃᔭᓚᐅᖅᐳᖅ ᐃᓄᐃᑦ ᑐᓴᕈᑎᓕᕆᔩᑦ ᑲᓇᑕᒥ ᐊᕐᕌᒍᓂᑦ 23-ᓂᑦ ᑕᑯᓐᓇᒐᒃᓴᓕᐅᖅᑎᑦᑎᔨᐅᓪᓗᓂ. ᐊᑖᑕᑦᑎᐊᖑᕗᖅ 22-ᓄᑦ ᓄᑕᖅᑲᓄᑦ.
|
ᐋᓚᓐ ᐅᐃᒃᔅ |
ᐋᓚᓐ ᐅᐃᒃᔅ ᐃᓅᓚᐅᖅᓯᒪᕗᖅ, ᐱᕈᖅᓴᖅᓚᐅᖅᖢᓂᓗ ᐃᓕᓐᓂᐊᕆᐊᖅᓚᐅᖅᖢᓂᓗ ᓅᕙ ᓯᑰᓯᐊᒥ. ᓅᕙ ᓯᑰᓯᐊᑉ ᓯᓚᑦᑐᖅᓴᕐᕕᖓᓂᑦ ᐃᓕᓐᓂᐊᕌᓂᓚᐅᖅᐳᖅ ᐸᐃᑉᐹᖅᑖᖅᖢᓂᓗ ᐃᓄᓕᕆᓂᕐᒧᑦ. ᓅᕙ ᓯᑰᓯᐊᒥ, ᐃᖅᑲᖅᑐᐃᔨᕋᓛᖑᓚᐅᖅᐳᖅ ᐊᕐᕌᒍᓂᑦ 11-ᓂᑦ, ᐃᖅᑲᖅᑐᐃᕕᒃᑎᒍᑦ ᒪᓕᒋᐊᖃᖅᑐᓂᒃ ᑲᒪᔨᐅᖑᓚᐅᖅᖢᓂ, ᓄᑕᖅᑲᓂᒡᓗ ᓴᐳᒻᒥᒡᐅᓚᐅᖅᖢᓂ ᐊᒻᒪ ᐊᑯᓐᓂᐊᖓᓃᖅᑎᐅᓚᐅᖅᖢᓂᓗ ᓇᓪᓕᐅᒃᑯᒫᖅᑐᓕᕆᔨᒃᑯᓐᓄᑦ. ᐋᓚᓐ ᐅᑭᐅᖅᑕᖅᑐᕐᒥ ᓄᓇᖃᖅᓯᒪᓕᖅᑐᖅ ᐊᕐᕌᒍᓂᒃ ᐱᖓᓱᓂᒃ ᓄᓇᓕᖕᒥᓗ ᖃᓄᐃᓕᐅᖃᑕᐅᕙᒃᖢᓂ. ᐃᖃᓗᐃᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᐃᒃᓯᕙᐅᑕᖓᑕ ᑐᒡᓕᒋᔭᐅᔪᖅ. ᐋᓚᓐ ᐊᒥᓱᓂᒃ ᐊᕐᕌᒍᓂᒃ ᐃᖅᑲᓇᐃᔭᖃᑦᑕᖅᓯᒪᓕᖅᑐᖅ ᐃᓄᐃᑦ ᐃᓕᖅᑯᓯᖃᖃᑎᒌᙱᑎᓪᓗᒋᑦ.
|
ᒥᐊᕆᐊᓐ ᓚᕝ |
ᒥᐊᕆᐊᓐ ᓚᕝ 1982ᒥᑦ ᐃᖃᓇᐃᔭᕆᐊᓯᓚᐅᖅᓯᒪᔪᖅ ᓄᓇᕗᑦ ᒐᕙᒪᒃᑯᖓᓐᓄᑦ (ᑕᐃᓱᒪᓂ ᓄᓇᑦᑎᐊᑉ ᒐᕙᒪᖓᐅᑎᓪᓗᒍ). ᐳᖅᑐᓂᖅᓴᒥᒃ ᐊᖓᔪᖃᖑᓯᒪᓕᖅᑐᖅ ᐊᕐᕋᒍᓄᑦ 8ᓄᑦ. ᒥᐊᕆᐊᓐ ᐃᑲᔪᖅᑐᐃᓯᒪᔪᖅ ᐃᓐᓇᕐᓂᒃ ᐅᖃᓕᒫᕆᐅᒃᓴᔪᓄᑦ ᑎᑎᕋᕆᐅᒃᓴᔪᓄᓪᓗ, ᐊᕕᒃᑐᖅᓯᒪᓂᖅ 23 ᐱᒋᐅᖅᓴᑎᑕᐅᓂᕐᒧᑦ ᐱᒋᐊᓐᖓᕈᑎᓂᒃ, ᓄᓇᓕᖕᒥᒃ ᑲᒪᒋᔭᖃᕐᓂᕐᒥᒃ, ᐊᒻᒪᓗ ᐃᖃᓇᐃᔭᕐᕕᖕᒥᑦ ᑲᑐᔾᔨᖃᑎᒋᖕᓂᕐᒥᒃ, ᑕᐃᒪᖓᓂ ᐃᖃᓇᐃᔭᕐᓂᓕᒪᒥᓂᒃ. |
ᓕᐅ ᐊᖑᑎᐊᓗᒃ |
ᓕᐅ ᐊᖑᑎᐊᓗᒃ ᐱᓕᕆᔨᐅᓯᒪᓕᖅᑐᖅ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᐱᒋᐊᖅᖢᓂ ᒪᔾᔨ 2006ᒥ. ᑭᒡᓕᓯᓂᐊᖅᑎᓄ ᐱᓕᕆᔨᖑᓚᐅᕋᓂᓱᓕ ᓴᓪᓕᕐᒥᑦ ᓴᒃᑯ ᐃᓕᓐᓂᐊᕐᕕᖓᓂᑦ ᐃᖃᓇᐃᔮᖃᖅᓯᒪᔪᑦ ᐃᓕᓐᓂᐊᖅᑎᓂᒃ ᐃᑲᔪᖅᑎᐅᓂᕐᒥᒃ. |
ᕈᓯ ᑕᓄᔭᖅ ᐃᐅᓪ |
ᕈᓯ ᑕᓄᔭᖅ ᐃᐅᓪ ᐃᒡᓕᓗᒐᕐᔪᖕᒥᑦ ᐱᕈᖅᓴᓚᐅᖅᓯᒪᔪᖅ. ᕈᓯᓗ ᐃᓚᒌᑦ ᓴᓪᓕᕐᒧᑦ ᓅᓕᓚᐅᖅᓯᒪᔪᑦ 1996ᖑᑎᓪᓗᒍ. 1999 ᐊᐅᔭᖓᓂᑦ, ᐃᖃᓇᐃᔭᕆᐊᓯᓚᐅᖅᓯᒪᔪᖅ ᓄᓇᕗᑦ ᒐᕙᒪᒃᑯᓂᑦ ᐃᓄᓕᕆᔨᐅᓂᕐᒥᒃ. ᕈᓯ ᐱᒋᐊᓕᓚᐅᖅᑐᖅ ᐃᖃᓇᐃᔭᒥᓂᒃ ᑭᒡᓕᓯᓂᐊᖅᑎᐅᓂᕐᒥᒃ ᒪᔾᔨ 2006ᒥ. ᐃᖃᓇᐃᔭᖅᓯᒪᓂᕆᔭᖓ ᐅᓪᓗᒥᒧᑦ ᐊᑑᑎᖃᓈᕐᓯᒪᔭᖓ ᐊᓕᐊᓇᐃᒋᓪᓗᓂᐅᒃ ᐱᐅᓯᖃᑎᒋᖏᑦᑐᓂᒃ ᑭᒃᑯᑐᐃᓐᓇᓂᒃ ᐱᒍᔾᔨᔨᓂᒡᓗ ᐃᖃᓇᐃᔭᖃᑎᖃᕐᖢᓂ. |
ᕇᒪ ᑲᔾᔭ |
ᕇᒪ ᑲᔾᔭ ᐃᖅᑲᓇᐃᔮᕆᕙᒃᑕᖏᑦ ᑭᒃᑯᓕᒫᑦ ᐱᔪᓐᓇᐅᑎᖏᓐᓂᒃ, ᐊᐅᓚᑦᑎᓂᕐᒧᑦ ᒪᓕᒐᓕᕆᓂᕐᒥᒃ ᐊᒻᒪ ᒐᕙᒪᒥ ᒪᓕᒐᓕᕆᓂᕐᒥ. ᐃᖅᑲᓇᐃᔭᖃᑦᑕᕐᓂᑰᕗᖅ ᐊᓐᑎᐊᕆᔫᑉ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑲᑎᒪᔨᖏᓐᓄᑦ ᐊᒻᒪ ᐊᓐᑎᐊᕆᔫᑉ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑎᓕᔭᐅᒥᒪᔪᓄᑦ ᐊᕐᕌᒍᑦ 11 ᐅᖓᑖᓂ. ᒪᓕᒐᓕᕆᖃᑦᑕᕐᓂᑰᒋᕗᖅ ᐊᓐᑎᐊᕆᐆᑉ ᒐᕙᒪᖓᑕ ᒪᓕᒐᓕᕐᕕᖓᓂ ᐃᖅᑲᖅᑐᐃᕕᒃᑰᕈᑕᐅᔪᓄᓪᓗ ᒪᓕᒐᓕᕆᔨᐅᓚᐅᕆᓪᓗᓂ ᒪᑲᐅᑎ ᑕᑦᑐᕈᒃᑯᓐᓄᑦ. |
ᓯᐅᕆᑕᓐ ᐸᕐᓂᑦ |
ᓯᐅᕆᑕᓐ ᐸᕐᓂᑦ ᐱᒋᐊᖅᑎᑦᑎᓯᒪᕗᖅ Boreal ᐅᐸᒃᕕᒃ ᐸᖅᓯᖓᐅᑎᔪᓄᑦ ᑐᑭᑕᕈᑎᓕᐅᕐᕕᖕᒥᒃ, ᐃᓂᖃᖅᑐᖅ ᓯᒡᔭᖓᓂᒃ ᑕᓯᕐᔪᐊᑉ ᑕᓐᑐ ᐸᐃᒥ, ᐊᓐᑎᐅᕆᔪᒥ. ᐃᓕᓴᖅᓯᒪᔪᖅ ᐊᑯᓂᕐᑐᒥᒃ ᒪᑐᒥᖓ ᐸᖅᓯᖓᐅᑎᐅᓲᓂᒃ, ᐊᖀᒍᑎᒃᓴᖅᓯᐅᕈᓐᓇᕐᓂᕐᒥᒃ ᐊᒻᒪᓗ ᓴᐃᒪᖃᑏᒋᒍᑎᓕᐅᕐᓂᕐᒥᒃ, ᐱᖃᓯᐅᑎᓪᓗᒋᑦ ᒪᑯᐊ ᓄᓇᕐᔪᐊᓕᒫᒥᒃ ᐃᓕᓴᕆᔭᐅᓂᓖᑦ ᓄᓇᕐᔪᐊᓕᒪᒥ ᐸᖅᓯᖓᐅᑎᐅᓲᓄᑦ ᖃᐅᔨᓴᖅᑕᐅᕕᖕᒥᒃ ᐃᓕᓐᓂᐊᕐᕕᒡᔪᐊᖓᓂ ᐅᓪᔅᑐᒥ, ᐊᐃᓚᓐᒥ, ᐊᒻᒪᓗ ᐅᔅᒎᑎ ᐱᖁᔭᓕᕆᓂᕐᒥᒃ ᐃᓕᓐᓂᐊᕐᕕᖓᓂ ᑕᐃᑲᓂ ᐱᔭᕆᕈᓯᖅᑕᐅᓯᒪᔪᖅ ᐱᖁᔭᓕᕆᓂᕐᒥᒃ ᐱᖁᔭᓕᕆᓂᕐᒥᒃ 2004ᖑᑎᓪᓗᒍ.
1988ᒥ ᐱᒋᐊᖅᖢᓂ ᓯᐅᕆᑕᓐ ᐃᖃᓇᐃᔭᖅᓯᒪᓕᖅᑐᖅ ᐅᑯᓇᓂ ᒐᕙᒪᑐᖃᒃᑯᓐᓂᑦ, ᓄᓇᐃᑦ ᐊᕕᒃᑐᕐᓯᒪᓂᖏᓐᓂ ᐊᒻᒪᓗ ᓄᓇᖃᖃᖅᓯᒪᔪᐃᑦ ᒐᕙᒪᒃᑯᖏᓐᓂᒃ ᒪᑯᓂᖓᓗᐊᖑᐊᖅ ᐸᖅᓯᖓᐅᑎᓂᕐᒧᑦ ᑐᑭᑕᕐᓂᕐᒥᒃ, ᓄᓇᑖᕋᓱᖕᓂᕐᒧᑦ ᐊᒻᒪᓗ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ. ᓄᓇᕗᒻᒥᑦ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑭᒡᓕᓯᓂᐊᖅᑎᑯᑦ ᓴᕿᑕᐅᓚᐅᖅᓯᒪᖕᒪᑕ ᑕᐃᒪᖓᑦ ᐃᖃᓇᐃᔭᓕᖅᑐᖅ ᐊᕿᒍᑎᒃᓴᖅᓯᐅᑎᐅᓂᕐᒥᒃ, ᐃᓕᓐᓂᐊᖅᑎᑎᕙᒃᖢᓂᓗ, ᐊᒻᒪᓗ ᖃᐅᔨᒪᑎᑦᑎᔨᐅᓂᕐᒥᒃ. |