ᖃᓄᐃᓕᖓᓕᕋᔭᖅᐸ ᖃᐅᔨᒃᑲᐃᔾᔪᑎᓕᐅᕆᖅᓯᒪᓕᕈᒪ?
ᑭᒡᓕᓯᓂᐊᖅᑎᒃᑯᓂ ᐊᐅᓚᑦᑎᔨ ᕿᒥᕐᕈᒐᔭᖅᑐᖅ ᖃᐅᔨᒃᑲᐃᔾᔪᑎᒥᒃ ᑐᓴᐅᒪᔭᐅᔭᕆᐊᓕᓕᒪᑦ ᐱᑕᖃᑦᑎᐊᕋᓗᐊᕐᒪᖓᑕ ᒪᑯᐊ:
- ᖃᐅᔨᒃᑲᐃᔾᔪᑎᓕᐅᖅᑑᑉ ᑭᐅᖃᑦᑕᕐᓂᐊᖅᑑᓪᓗ ᓇᓗᓇᐃᒃᑯᑕᖏᑦ ᓇᒥᓐᓂᕆᓂᐊᖅᑕᖏᓪᓗ
- ᑎᑎᖃᖁᑎᓕᒫᑦ ᐊᑎᓕᐅᖅᑕᐅᓯᒪᒐᓗᐊᕐᒪᖓᑕ
- ᖃᓄᐃᓕᐅᖅᑕᐅᓂᕕᓂᐅᑉ ᐅᓂᒃᑲᖅᑕᐅᓂᖓ
- ᑕᐃᒪᐃᒋᐊᖃᕈᓂ ᐅᕝᕙᓗᓐᓂᑦ ᑐᒃᓯᕌᕆᔭᐅᒍᓂ, ᑎᑎᖃᖁᑎᓕᒪᑦ ᐅᖃᐅᓯᐅᑉ ᐊᐃᑉᐸᖓᓅᓕᖅᑎᑕᐅᓯᒪᔭᕆᐊᓖᑦ ᐱᓕᕆᐊᖑᖃᑕᐅᔫᑉ ᓂᕈᐊᖅᑕᖓᓄᑦ.
ᖃᐅᔨᒃᑲᐃᔾᔪᑎᓕᐊᕕᓂᐅᑉ ᐊᔾᔨᖓᓂᒃ ᐱᑎᑕᐅᒐᔭᖅᑐᑦ ᑭᓇᑐᐃᓐᓇᖅ(ᑯᑦ) ᐅᕝᕙᓘᓐᓂᑦ ᐱᔨᑦᑎᕋᖅᑎᐅᔪᑦ ᑕᐃᔭᐅᒃᐸᑕ ᑭᐅᔪᓐᓇᕐᓂᕋᖅᑕᐅᓗᑭᒃ ᖃᐅᔨᒃᑲᐃᔾᔪᑎᒥᒃ. ᑭᐅᔪᓐᓇᕐᓂᕋᖅᑕᐅᔪᖅ ᑭᐅᔪᓐᓇᕐᕕᖃᕆᐊᓕᒃ ᖃᐅᔨᒃᑲᐃᔾᔪᑎᒧᑦ.
ᑭᐅᔨᐅᔪᖅ ᑕᑕᑎᖅᓯᔭᕆᐊᓕᒃ ᑭᐅᔾᔪᑎᖓᓂᒃ ᖃᐅᔨᒃᑲᐃᔾᔪᑎᐅᑉ ᐅᑎᖅᑎᓪᓗᒍᓗ ᑭᒡᓕᓯᓂᐊᖅᑎᒃᑯᑦ ᑎᑎᕋᖅᕕᖓᓐᓄᑦ. ᑭᐅᔨᐅᔪᖅ ᑭᐅᔾᔪᑎᓕᐅᕆᐊᓕᒃ ᐅᓪᓗᐃᑦ 60 ᑐᖔᓂᑦ.
ᑭᐅᔾᔪᑎ ᑎᑭᑉᐸᑦ ᐊᔾᔨᖓᓂᒃ ᐱᑎᑕᐅᒐᔭᖅᑐᖅ ᑐᒃᓯᕋᐅᑎᓕᐅᖅᑐᕕᓂᖅ.
ᖃᐅᔨᒃᑲᐅᔾᔪᑎᓕᐊᕕᓂᖅ ᑭᐅᔾᔪᑎᓕᐊᕕᓂᕐᓗ ᕿᒥᕐᕈᔭᐅᓕᕋᔭᖅᑐᑦ ᑭᒡᓕᓯᓂᐊᖅᑎᓄᑦ (ᑕᐃᔭᐅᖕᒥᔪᖅ ᐃᓗᓕᖏᑦ 4 ᕿᒥᕐᕈᓂᖅ). ᕿᒥᕐᕈᓂᖅ ᐱᔭᖀᕆᖅᑕᐅᒃᐸᑦ ᑐᑭᑕᓕᕋᖀᔭᖅᑐᑦ ᑲᔪᓯᔪᒃᓴᐅᖕᒪᖓᑕ ᖃᓄᐃᓕᒋᐊᕈᑕᐅᔪᒃᓴᑦ ᐅᕝÉᕙᓗᓐᓂᑦ ᐱᖅᑎᑦᑎᓇᔭᕐᒪᖓᑕ ᖃᐅᔨᒃᑲᔾᔪᑎᓕᐊᕕᓂᕐᒥᒃ ᒪᓕᒡᓗᑎᒃ ᐊᑐᕆᐊᓕᖕᓂᒃ ᐊᕕᒃᑐᖅᓯᒪᓂᖅ 23 ᐊᒻᒪ 24 ᐱᖁᔭᕐᓂᒃ:
- ᖃᓄᐃᓕᐅᕐᓂᐅᔪᕕᓂᖅ ᐊᑑᑎᔪᕕᓂᐅᒃᐸᑦ ᐊᕐᕌᒍᒃ ᒪᕐᕈᒃ ᐃᓗᐊᓂ;
- ᑭᓇᑐᐃᓐᓇᖅ ᖃᐅᔨᒃᑲᐃᔾᔪᑎᓕᐅᕈᔾᔭᐅᔪᕕᓂᐅᒃᐸᑦ ᑭᒡᒐᖅᑐᖅᑕᐅᓗᓂ ᐊᓯᐊᓄᑦ ᑭᓇᑐᐃᓐᓇᒧᑦ;
- ᐅᓐᓂᕐᓗᒃᓴᐅᑎᓕᐊᕕᓂᖅ ᐊᓯᐊᒍᑦ ᐱᖁᔭᓕᐅᖅᑎᒃᑰᕆᐊᖃᕋᓗᐊᖅᐸᑕᓗᓐᓂᑦ;
- ᐅᓐᓂᕐᓘᑎᓕᐊᕕᓂᖅ ᒥᑭᑦᑐᑯᓘᒐᓗᐊᖅᐸᑦ, ᑐᑭᓯᓇᑦᑎᐊᖏᒃᑲᓗᐊᕈᓂ, ᐃᔪᕐᓇᕋᓗᐊᕈᓂ ᐅᕝᕙᓗᓐᓂᑦ ᐱᔾᔪᑎᖓ ᑕᐃᒪᓇᐃᓕᐅᕈᑕᔭᕆᐊᖃᖏᒃᑲᓗᐊᕈᓂ;
- ᐅᓐᓂᕐᓗᑎᓕᐊᕕᓂᖅ ᐊᑐᖅᑕᐅᖁᔭᐅᖏᑦᑐᐃᑦ ᐊᑖᓂᒃ ᑎᑎᕋᖅᑕᐅᓯᒪᓂᖃᕋᓗᐊᕈᓂ;
- ᐊᔾᔨᒌᒡᕕᐅᖏᓐᓂᕐᒧᑦ ᖃᐅᔨᔭᐅᔪᕕᓂᕐᒥᒃ ᐱᑕᖃᕋᓗᐊᖅᐸᑦ ᐊᒻᒪᓗ ᐃᒻᒥᓂᒃ ᓴᐳᒻᒥᔾᔪᑎᖃᑎᐊᕋᔭᕋᓗᐊᕈᓂ; ᐊᒻᒪᓗ
- ᖃᐅᔨᒃᑲᐃᔾᔪᑎᓕᐅᖅᑐᕕᓂᖅ ᒪᓂᕝᕕᐅᔪᕕᓂᐅᒐᓗᐊᖅᐸᑦ ᓈᒻᒪᒃᑐᒥᒃ ᐊᖏᖃᑎᒌᒡᓗᑎᒃ ᐊᑭᓕᐅᑎᐅᒐᔭᖅᑐᒥᒃ.
ᑭᒡᓕᓯᓂᐊᖅᑏᑦ ᐃᓚᖓ 4 ᕿᒥᕐᕈᓂᖅᒥᒃ ᐊᑐᕐᓗᑎᒃ ᑐᓂᔨᒐᔭᖅᑐᑦ ᖃᐅᔨᒃᑲᐃᔾᔪᑎᓕᐅᖅᑐᕕᓂᕐᒧᑦ ᐊᒻᒪᓗ ᑭᐅᔨᐅᔪᒧᑦ ᑎᑎᕋᖅᓯᒪᔪᒥᒃ ᐃᓱᒪᑖᕈᑎᕕᓂᕐᒥᖕᓂᒃ. ᐃᓱᒪᑖᕈᑎᕕᓂᖓᑦ ᑐᑭᑕᕐᓯᒪᒐᔭᖅᑐᖅ ᓇᓕᐊᖕᓂᑐᐃᓐᓇᖅ ᑲᔪᓯᓂᖃᕆᐊᖃᕐᒪᖓᑦ ᐅᕝᕙᓘᓐᓂᑦ ᐱᖅᑕᐅᔭᕆᐊᖃᕋᔭᕐᒪᑦ ᖃᐅᔨᒃᑲᐃᔾᔪᑎᓕᐊᕕᓂᖅ.
ᖃᐅᔨᒃᑲᐃᔾᔪᑎᓕᐊᕕᓂᖅ ᑲᔪᓯᔭᕆᐊᖃᖅᐸᑦ ᑭᒡᓕᓯᓂᐊᖅᑎᒃᑯᑦ ᐊᖏᖃᑎᖃᕋᓱᓕᕋᔭᖅᑐᑦ ᖃᐅᔨᒃᑲᐃᔾᔪᑎᓕᐅᖅᑐᕕᓂᕐᒥᒃ ᐱᔭᕆᖃᑎᖃᕋᓱᒃᓗᑎᒃ ᐅᑯᐊᖑᓗᑎᒃ ᑭᒡᓕᓯᓂᐊᖅᑎᓄᑦ ᐃᓚᒋᔭᐅᔪᑦ, ᐃᒻᒥᒍᖅᑐᑦ ᐋᕿᒍᑎᒃᓴᖅᓯᐅᕐᑎ, ᓄᓇᓕᖕᓂᑦ ᐃᓐᓇᕆᔭᐅᔪᑦ ᐅᕝᕙᓘᓐᓂᑦ ᐊᓯᖏᑦ ᑎᒥᐅᔪᐃᑦ.
ᖃᐅᔨᒃᑲᐃᔾᔪᑎᓕᐅᖅᑐᕕᓂᖅ ᐊᒻᒪᓗ ᑭᐅᔨᐅᔪᖅ ᑎᓕᐅᖅᑕᐅᕗᑦ ᐋᕿᒍᑎᒃᓴᖅᓯᐅᕐᑎᒥᒃ ᐃᓚᖃᕐᓗᑎᒃ ᐊᖏᖃᑎᒋᒃᑎᑕᐅᓇᓱᐊᕐᓂᕐᒧᑦ ᐊᑲᐅᖏᓕᐅᕈᑕᐅᔪᖅ ᐱᓪᓗᒍ.
ᐊᑲᐅᖏᓕᐅᕈᑕᐅᔪᖅ ᐊᖏᕈᑕᐅᒃᐸᑦ ᐊᒻᒪᓗ ᐊᖏᖃᑎᒋᖕᓂᕐᒧᑦ ᐊᑎᓕᐅᕐᓂᖅ ᐱᔭᕆᖅᐸᑦ, ᖃᐅᔨᒃᑲᐃᔾᔪᑎᓕᐊᕕᓂᖅ ᐱᔭᕇᕋᔭᖅᑐᖅ. ᑕᐃᒪᐃᒃᑲᓗᐊᖅᑎᓪᓗᒍ ᑭᓯᐊᓂ ᓇᓪᓕᐊᑐᐃᓐᓇᖅ ᐱᓕᕆᐊᖑᖃᑕᐅᔪᖅ ᐊᖏᕈᑎᒋᓯᒪᔭᖏᓐᓂᒃ ᑎᑎᕋᖅᑕᐅᓯᒪᔪᓂᒃ ᐊᖏᕈᑎᖏᑦᑕ ᐃᓗᐊᓂᑦᑐᓂᒃ ᒪᓕᖕᓂᖏᒃᑯᓂ, ᐅᖃᐅᓯᐅᒐᔭᖅᑐᖅ ᓄᓇᕗᒻᒥᑦ ᐃᖃᖅᑐᐃᔨᒃᑯᑦ ᒪᓕᒐᓕᕆᔨᖏᓐᓄᑦ ᐊᒻᒪᓗ ᐃᖃᖅᑐᐃᕕᒃᑯᓂ ᑲᒪᒋᔭᐅᒐᔭᖅᑐᖅ. ᐊᖏᖃᑎᒌᒍᓐᓇᖏᑉᐸᑎᒃ, ᑭᒡᓕᓯᓂᐊᖅᑏᑦ ᑭᒃᑯᑐᐃᓐᓇᕐᓂᒃ ᑐᓵᑎᑦᑎᓕᕋᔭᖅᑐᑦ ᑕᒃᑯᐊ ᑕᒪᕐᒥᒃ ᖃᐅᔨᒃᑲᐃᔪᑎᓕᐅᖅᑐᕕᓂᖅ ᑭᐅᔨᐅᔪᕐᓗ ᖃᐅᔨᔭᐅᔪᕕᓂᕐᓂᒃ ᓴᕿᑎᑦᑎᒋᐊᖃᕋᔭᖅᑑᒃ ᓱᓕᓂᕋᕐᓗᑎᒃ ᐊᖏᕐᓗᑎᒃ ᐊᒻᒪᓗ ᑕᐅᑐᒃᑐᕕᓃᑦ ᖃᐃᖁᔭᐅᒐᔭᖅᖢᑎᒃ.
ᑭᒡᓕᓯᓂᐊᖅᑎᓄᑦ ᐃᓚᒋᔭᐅᔪᖅ ᐅᖃᓪᓚᒡᕕᖃᓚᐅᖅᓯᒪᖏᓪᓗᓂ ᖃᐅᔨᒃᑲᔾᔪᑎᓕᐅᖅᑐᕕᓂᕐᒥᒃ ᐅᕝᕙᓗᓐᓂᑦ ᑭᐅᔨᐅᔪᒥᒃ ᑲᒪᒋᔭᐅᓂᓕᒫᖓᓐᓂᒃ ᑎᓕᔭᐅᒐᔭᖅᑐᖅ ᑐᓵᑎᑕᐅᓗᓂ ᖃᐅᔨᒃᑲᐃᔾᔪᑎᓕᐅᖅᑐᕕᓂᕐᒥᒃ.
ᑐᓵᑎᑕᐅᓂᖅ ᐃᓚᖃᕋᔭᖅᑐᖅ ᒪᑯᓂᖓ ᖃᐅᔨᔭᐅᔪᕕᓂᕐᓂᒃ ᑐᓵᓂᖅ ᓱᓕᓂᕋᕐᓗᓂ ᐊᒻᒪᓗ ᐃᒻᒥᒍᕐᓗᓂ (ᐊᖏᖅᓯᒪᓗᓂ) ᐅᑯᑎᒍᓇᖅ ᑕᐅᑐᒃᑐᕕᓂᐅᓂᕐᒧᑦ, ᐊᔾᔨᐸᓗᖃᕐᓗᓂ ᐃᖃᖅᑐᐃᕕᒡᔪᐊᕐᒥᒃ. ᐱᓕᕆᐊᖑᖃᑕᐅᔪᐃᑦ ᐱᖁᔭᓕᕆᔨᒥᒃ ᑭᒡᒐᖅᑐᑎᖃᕈᓐᓇᖅᑑᒃ.
ᖃᐅᔨᔭᐅᔪᕕᓂᕐᓂᒃ ᑐᓵᔭᕆᖅᐸᑕ ᐊᒻᒪᓗ ᐊᐃᕙᐅᑎᒋᔭᐅᔪᓂᒃ ᑕᒃᑯᓄᖓ ᖃᐅᔨᒃᑲᐅᔾᔪᑎᓕᐅᖅᑐᕕᓂᕐᒧᑦ ᑭᐅᔨᐅᔪᒧᓪᓗ, ᑭᒡᓕᓯᓂᐊᖅᑏᑦ ᑐᑭᑖᓕᕋᔭᖅᑐᑦ ᖃᐅᔨᒃᑲᐃᔾᔪᑎᓕᐅᖅᑐᕕᓂᖅ ᐊᔾᔨᐅᖏᑎᑕᐅᔪᕕᓂᐅᖕᒪᖓᑦ, ᐊᔾᔨᐅᖏᑎᑕᐅᔪᕕᓂᐅᒃᐸᑦ ᐊᕿᒃᑕᐅᓇᓱᒃᑲᔭᖅᑐᖅ ᑕᒻᒪᕈᑕᐅᔪᕕᓂᖅ.
ᖃᐅᔨᔭᐅᔪᕕᓃᑦ ᑐᓵᔭᐅᑎᓪᓗᒋᑦ ᑎᑎᕋᖅᑕᐅᓗᑎᒃ ᐃᓱᒪᓕᐊᖑᓕᕋᔭᖅᑐᑦ ᐊᒻᒪᓗ ᖃᓄᖅ ᐱᖁᔭᖅ ᐊᑐᖅᑕᐅᒐᔭᕐᒪᖓᑦ. ᑭᖑᓪᓕᖅᐸᒥᒃ ᐃᓱᒪᓕᐊᕆᔭᐅᔪᖅ ᑎᓕᔨᑐᐃᓐᓇᕆᐊᓕᒃ ᐱᓕᕆᐊᖑᖃᑕᐅᔪᓂᒃ ᐃᒪᐃᖁᔨᓗᑎᒃ:
- ᐱᓕᕆᐊᖑᖃᑕᐅᔪᖅ ᐅᑎᖅᑎᑎᕕᐅᖁᔭᐅᓗᓂ ᐊᑭᓕᐅᑎᓂᒃ,
- ᐊᑐᖅᑕᐅᖁᔭᐅᓯᒪᖏᑦᑐᓂᒃ ᐱᐅᓯᖃᕐᓂᖅ ᓄᖅᑲᖁᔭᐅᓗᓂ,
- ᐃᓕᓐᓂᐊᖁᔭᐅᒐᔭᖅᑐᖅ ᓇᐅᒃᑯᓕᒫᖅ ᐊᑑᑎᔪᑎᒃᓴᒥᒃ,
- ᒪᒥᐊᖁᔭᐅᓗᓂ ᐅᕝᕙᓘᓐᓂᑦ
- ᑭᒡᓕᓯᓂᐊᖅᑏᑦ ᓇᒻᒪᒐᓱᒋᔭᕐᒥᖕᓂᒃ ᐊᕿᒋᐊᕈᑎᓂᒃ ᖃᓄᐃᓕᒋᐊᖁᔨᒐᖀᖅᑐᑦ.
- ᑭᒡᓕᓯᓂᐊᖅᑏᑦ ᑎᓕᓯᔾᔪᑎᖏᑦ ᐊᑐᓕᖅᑎᑕᐅᓯᒪᕗᑦ ᓄᓇᕗᑦ ᐱᖁᔭᓄᑦ ᐃᖃᖅᑐᐃᔨᑯᖏᑎᒍᑦ.
ᑐᓴᖅᑎᑦᑎᓂᕐᒧᑦ ᖃᓄᐃᓕᖓᓂ ᐱᒋᐊᕐᓗᓂ ᒫᔨ 31, 2011
| ᑎᑎᖅᑲᖁᑎ # | ᑎᑎᖅᑲᖁᑎᐅᑉ ᖃᓄᐃᑦᑑᓂᖓ | ᐱᔭᐅᔪᖅ | ᐊᑐᕐᓂᖓ for (ᐊᕐᕌᒍᓄᑦ) |
| 05-13 | ᓈᓚᖕᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 08/11/2005 | 5.3 |
| 05-15 | ᓯᕗᓂᐊᒍᑦ ᓈᓚᖕᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 08/12/2005 | 5.0 |
| 06-04 | ᓯᕗᓂᐊᒍᑦ ᓈᓚᖕᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 23/10/2006 | 4.4 |
| 06-11 | ᐋᖅᑭᒍᔾᔨᓇᓱᐊᕐᓂᖅ ᐃᓂᒃᓴᓕᐅᖅᑕᐅᓯᒪᔪᖅ | 11/01/2007 | 4.2 |
| 07-03 | ᐋᖅᑭᒍᔾᔨᓇᓱᐊᕐᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 04/06/2007 | 3.8 |
| 07-05 | ᓯᕗᓂᐊᒍᑦ ᓈᓚᖕᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 13/07/2007 | 3.7 |
| 08-06 | ᐃᓱᒪᓕᐅᕈᑕᐅᕙᓪᓕᐊᔪᖅ | 12/02/2009 | 2.1 |
| 09-01 | ᐱᓇᓱᐊᕈᓐᓇᐅᑦ ᐱᔭᕇᖅᑕᐅᓯᒪᖏᑦᑐᖅ | 01/10/2009 | 1.5 |
| 09-02 | ᐋᖅᑭᒍᔾᔨᓇᓱᐊᕐᓂᖅ ᐃᓂᒃᓴᓕᐅᖅᑕᐅᓂᐊᕐᓗᓂ | 02/10/2009 | 1.5 |
| 09-05 | ᐃᓱᒪᓕᐅᕈᑕᐅᕙᓪᓕᐊᔪᖅ | 10/12/2009 | 1.3 |